前TVB「御用皇帝」江華戴頭巾拍片 大方承認有地中海

前TVB「御用皇帝」62歲江華息影多年，2021年尾曾有傳佢將復出拍戲，不過至今仍未見有新作品，但依然活躍於社交平台，不時都會拍片放上抖音同網民互動。最近佢又喺抖音分享日常生活片段，仲回覆網民留言大方自爆自己有地中海。

江華喺好幾年前已經陷入中年脫髮危機，更一度上載M字額嘅自拍照，不過喺22年變回濃密髮頂。後來佢又經常戴上帽子或頭巾示人，睇落佢嘅脫髮問題仍未解決。最近江華拍片並上載到抖音同網民分享，片中嘅佢喺茶餐廳食緊叉燒飯，不過佢就依然戴住頭巾同黑超。影片出街後，有唔少網民大讚佢有型及帥氣，不過就有網民留意到佢嘅打扮，留言：「江華為什麽總喜歡帶帽子帶墨鏡吃飯呢？」之後就有網民回覆話：「地中海」，喺呢個時候就吸引到本尊親自回應，佢以一個寫有「哈哈哈 你說得對」嘅貼圖回覆，承認自己有地中海問題。